chhoTa Sa Ek Kaam Hamara Nahin Kiya

Basir Sultan Kazmi

chhoTa sa ek kaam hamara nahin kiya

‘basir’ tumhare yaar ne achchha nahin kiya

rahti rahi hai koi na koi kami zarur

aisa nahin kiya kabhi vaisa nahin kiya

do chaar baar dekh lo ḳhud ja ke us ke paas

kuchh be-sabab to ham ne kinara nahin kiya

kahte rahe ho tum use hamdard-o-gham-gusar

aur us ne baat karna gavara nahin kiya

gar thiin nigah men miri kotahiyan to Thiik

aghyar ne to koi ishara nahin kiya

hairan huun log kahte hain kyon us ko charagar

jis ne kisi mariz ko achchha nahin kiya

din raat ham ko qarz chukane ki fikr hai

go us ne vapsi ka taqaza nahin kiya

hote jo aaj un ki nigahon men sarfaraz

ham ne to koi kaam bhi aisa nahin kiya