Aftab Shamsi
sunahre khvabon ki vaadi men muddaton ham ne
kai makan basae kai makin badle
tamam umr raha intizar ka aalam
guzarte lamhon ka matam kiya nidhal rahe
na doston men koi ab na dushmanon men koi
hamare maazi ka ham se hisab le kar jo
hamare sud-o-ziyan ka laga ke andaza
hamen batae ki kya khoya ham ne kya paaya
bas ek vaqt ki thokar ba-shakl-e-sham-o-sahar
hamare paanv men lag lag ke puchhti hai roz
kahan se aae ho kab tak chaloge tum yunhi
javab is ka bhi hai us ke paas hi lekin
saval karne ki aadat si pad gai hai use
Leave a Reply