miTTi Ke Lutf-O-Kaif-O-Asar Se Nikalte Hum

miTTi ke lutf-o-kaif-o-asar se nikalte ham

mausam tha abr-o-bad ka ghar se nikalte ham

phir muntaqil hui hai badan se lahu ki aag

is sehr-gah-samt-o-safar se nikalte ham

nam-o-nasab ki dhund men kho.e hue hain sab

mahmez karte aur bhanvar se nikalte ham

tere baghair sub.h-o-masa ka havala kya

is kar-gah sham-o-sahar se nikalte ham

tu muntaḳhab hai tujh se hai ye rang-o-bu tamam

haan muntashir hain aib-o-hunar se nikalte ham

kaisa ḳhala hai sina-e-insan men ḳhema-zan

is mavara-e-naqd-o-nazar se nikalte ham

jaulangah-e-nashat bhi thi gham bhi the ‘ḳhumar’

divar-o-dar se shaḳh-o-shajar se nikalte ham