poet

Kabe Se Mujhko Lae Sawad-E-Kunisht Mein

kaabe se mujh ko laae savad-e-kunisht men

islah di buton ne khat-e-sar-navisht men

phirte hain kucha-e-but-e-qudsi-sarisht men

divane laten maar rahe bahisht men

kaffara-e-sharab main deta huun naqd-e-hosh

sargarm huun talafi-e-aamal-e-zisht men

aksar jaza-e-sajda men khani hain thokaren

likkha hai kya khat-e-kaf-e-pa sarnavisht men

huron se garmiyan jo kahun us sharir ki

lag jaae aag atish-e-gul se bahisht men

sunti hai roz naghma-e-zanjir-e-ashiqan

vo zulf bhi hai silsila-e-ahl-e-chisht men

zindan se ankhen senkne us gul ke ghar gae

dozakh se aag lene chale ham bahisht men

begane ik hamin nazar aae pas-e-fana

bedardon ka hujum hai bagh-e-bahisht men

but-khane men safedi-e-husn-e-farang hai

girje ki raushni hai savad-e-kunisht men

jal jal ke khaak hote hain be-ashk-o-ah ham

ab-o-hava nahin hai hamari sarisht men

garmi men tere kucha-nashinon ke vaste

pankhe hain qudsiyon ke paron ke bahisht men

sona kasaun ashrafi-e-dagh-e-sajda ka

sang-e-mahak lagaun bina-e-kunisht men

bijli chamak gai jo hansi men phadak gae

shokhi bhari hui hai tumhari sarisht men

tasviren teri dast-e-hinai ki le gae

chhape lahu ke ham ne lagae bahisht men

karti hain khuun charkh buton ki taalliyan

rang-e-shafaq lagati hai saqf-e-kunisht men

abr-e-bahar jauhar-e-shamshir-e-yar the

gulha-e-zakhm khil gae urdi-bahisht men

taqdir men hai teri dahan-o-kamar ka ishq

sirr-e-nihan likha hai miri sarnavisht men

di jaan ek huur ke bose ki chaat par

qismat ne mujh ko zahr diya hai bahisht men

choron se guftugu-e-khat-e-sabz-e-yar hai

tuuti kisi ka bol raha hai bahisht men

adna ghulam-e-shah-e-vilayat hue ‘munir’

dasht-e-najaf ki khaak hai meri sarisht men

More Poems

Leave a Comment