Haalat Meri Rah Mein Hail to Nahin The

Arsh Sahbai

halat miri raah men haa.il to nahin the

is zindagi men itne masa.il to nahin the

ye aaj achanak hui kyuun ham pe tavajjoh

vo lutf-o-karam pe kabhi maa.il to nahin the

ik dusre se duur nikal aa.e hain ham log

ham bhi kabhi ye fasle haa.il to nahin the

tu ne hamen shayad ghalat andaz se socha

ham tere tamanna.i the saa.il to nahin the

ab mo’taqid-e-gardish-e-halat hain varna

ham gardish-e-halat ke qaa.il to nahin the

chehre pe masarrat ki jhalak ḳhuub thi lekin

asar gham-o-dard ke zaa.il to nahin the

ik kushta-e-halat ki kuchh aas bandha.in

logon men magar aise ḳhasa.il to nahin the

jin kohna rusumat men ham jakḌe hue hain

un kohna rusumat ke qaa.il to nahin the

jiina baḌa mushkil tha magar phir bhi jiye ‘arsh’

jiine ke liye itne vasa.el to nahin the