Tum Se Multaji Ho Kar Kya Bataen Kya Paya

tum se multajī ho kar kyā batā.eñ kyā paayā

dil ke mudda.ī the ham dil kā mudda.ā paayā

ibtidā-e-ālam se intihā-e-ālam tak

tum ko ibtidā dekhā tum ko intihā paayā

sādgī-e-dil dekho e’tibār kar baiThe

ho ga.e usī ke ham jis ko āshnā paayā

ham se pūchhte kyā ho apne dil se ḳhud pūchho

ham ne tum se kyā paayā tum ne ham se kyā paayā

aañkh kholte hī kyuuñ is qadar masarrat hai

sub.h-dam ‘munavār’ kyā tum ne kuchh paḌā paayā

Leave a Comment