tevar bhi dekh lijiye pahle ghaTaon ke
phir badban kholiye ruḳh par havaon ke
tum saath ho to dhuup bhi mujh ko qubul hai
tum duur ho to paas bhi ja.un na chhanv ke
ḳhud hi charagh-e-va.ada bujha de jo ho sake
ye hausle bhi dekh le meri vafaon ke
log apna mudda.a-e-dili kah ke ja chuke
mazmun sochte rahe ham iltijaon ke
mujh ko har ek shart safar ki qubul hai
kanTe nikal de koi bas mere paanv ke
kanon men jaise koi shahd ghol de ‘zuhur’
kitni miThas hoti hai lahje men maaon ke
Leave a Reply