Manzoor Hashmi
jo khili chaman men na.i kali to vo jashn-e-saut-o-sada hua
kahin bulbulen huiin naghma-zan kahin raqs-e-bad-e-saba hua
koi phuul ḳhushbu se chuur sa koi rang halqa-e-nur sa
koi husn ghairat-e-hur sa tire naam saara likha hua
vo bichhaḌ gaya to pata chala ki tha saḳht kitna ye hadisa
gaya nuur jaise charagh ka ki badan se aks juda hua
jo savar rah-e-ziyan ke the kahin naam ab ke na kar sake
na junun men surḳh hui zamin na sukun men dasht hara hua
miri jang mere hi saath thi ki harif bhi tha halif bhi
kabhi doston men ghira hua kabhi dushmanon se mila hua
vo hava chali ki mire chaman hue raakh aur dhuven ke ban
ki hare shajar bhi sulag uThe ye bhari bahar men kya hua
Leave a Reply