Aisa Bhi Nahin Ki

Ahmad Hamesh

aisa bhi nahin ki mujhe zindagi ke ped ke paas

be-as aur be-sahara chhod diya gaya ho

main ne abhi abhi gilahriyon ki avaz suni hai

gilahriyan mere liye

bahisht ke akhrot la rahi hain

sivae is ke ki adam-zad kahin dikhai nahin deta

magar jangal bol raha hai ki is ke bol men

meri bichhdi hui avaz shamil hai

mere bal-bachchon ka pyaar shamil hai

sivae is ke ki jin logon ne mujhe be-nam

jaziron men le jaane ka vaada kiya tha

vo ab kahin dikhai nahin diye

to ab main kis se kahun

ki kahne sunne vaala zindagi ka nizam to baaqi nahin raha

avaae us ke ki mitti kah rahi hai

ki vo an-ginat ped paude tab ugaegi

jab main yahan hunga hi nahin