Tuk to ḳhamosh rakho munh men zaban sunte ho
apni hi kahte ho meri bhi miyan sunte ho
sang ko aab karen pal men hamari baten
lekin afsos yahi hai ki kahan sunte ho
ḳhushk o tar phunkti phirti hai sada atish-e-ishq
bachiyo is aanch se ai piir o javan sunte ho
dam-qadam tak thi hamare hi junun ki raunaq
ab bhi kuchon men kahin shor-o-fughan sunte ho
main kaha ḳhalq tumhari jo kamar kahti hai
tum bhi is ka kahin kuchh zikr-o-bayan sunte ho
hans ke yuun kahne laga ḳhair agar hai ye baat
huegi vaisi hi jaisi ki vahan sunte ho
hazrat-e-‘dard’ ki ḳhidmat men jab aa ‘qa.em’ ne
arz ki ye ki ai ustad-e-zaman sunte ho
amr hove to ‘hidayat’ ko karun main sidha
vaan se irshad hua ye ki miyan sunte ho
raast hote hain kisi se bhi kabhu kaj-tinat
tiir banti hai kahin shaḳh-e-kaman sunte ho
Leave a Reply