Zebunnisaa Zaibii
insan koi bhi to farishta bana nahin
sach puchhiye to koi yahan be-ḳhata nahin
vo jis ko apne dil ka fasana suna saken
ham ko to koi shaḳhs abhi tak mila nahin
chehra badal badal ke vo aaya hai bar-bar
vo ho kisi bhi chehre men mujh se chhupa nahin
kashti ko tu ne chhoḌ diya yuun hi naḳhuda
kya tu samajh raha hai hamara ḳhuda nahin
qaa.em rahe jo tauba pe saaqi ke ru-ba-ru
aisa to mai-kade men koi parsa nahin
ham hain qusur-var hamen e’tiraf hai
tohmat lagane vaale bhi to devta nahin
vo bevafa tha chhoḌ ke mujh ko chala gaya
main bhuul ja.un us ko magar bhulta nahin
us ke qarib ja.un to milta nahin hai vo
aur duur ho bhi ja.un to mujh se juda nahin
‘zebi’ rafiq hote hain sab achchhe daur ke
jab vaqt ho kaḌa koi pahchanta nahin
Leave a Reply