Baat Ke Sath Hi Maujud Hai Tal Ek Na Ek

baat ke saath hi maujud hai taal ek na ek

hai khilaf apne sada aap ke chaal ek na ek

ham bhi is vaste baithe hain ki ho rahta hai

tujh sahi sarv ke saaye men nihal ek na ek

yaar hai paas par ab fart-e-taraddud ke sabab

aa hi rahta hai mire dil ko malal ek na ek

main to har-chand bachata huun va-lekin haihat

khub hi jaata hai in ankhon men jamal ek na ek

tujhe kuchh husn-parasti se nahin kaam vale

ho hi rahta hai mire ji ka zaval ek na ek

kya karun garche bhulata huun bahut main lekin

aa hi rahta hai tira mujh ko khayal ek na ek

majlis-e-vajd men padh apni ghazal tu ‘insha’

kar hi baithega abhi sunte hi haal ek na ek

Leave a Comment