sar par thi kaḌi dhuup bas itna hi nahin tha
us shahr ke peḌon men to saaya hi nahin tha
paani men zara der ko halchal to hui thi
phir yuun tha ki jaise koi Duuba hi nahin tha
likkhe the safar paanv men kis tarah Thaharte
aur ye bhi ki tum ne to pukara hi nahin tha
apni hi nigahon pe bharosa na rahega
tum itna badal jaoge socha hi nahin tha
kanda the mire zehn pe kyuun us ke ḳhad-o-ḳhal
chehra jo miri aankh ne dekha hi nahin tha
Leave a Reply