hadis-e-ishq ko unvan la-javab mila
mujhe nigah mili hai use shabab mila
hamen nasib se qur.an la-javab mila
varaq jahan se khula zindagi ka baab mila
ḳhuda ke fazl se juya-e-ilm-o-danihs ko
nabi sa shahr mila aur ali sa baab mila
gunahgar hamin the tamam ḳhilqat men
hamen ko ashraf-e-maḳhluq ka ḳhitab mila
bas ek ḳhvab ki ta.abir DhunDhte guzri
tamam-umr ka hasil bas ek ḳhvab mila
jhuki jhuki si nigahon men iztirab nihan
na jaane kitne hijabon men be-hijab mila
jamal-e-yar ki ra.ana.iyon men aḳhir-e-shab
kahin ye kahkashan thi kahin shahab mila
zamin-e-sher hui aftab-e-burj-e-sharaf
‘anis’ fan men tire lutf-e-bu-turab mila
suḳhan samajhte hain ‘ja.afar’-raza ka.i ahbab
jo rah-e-shauq men naghmat ka sarab mila
Leave a Reply