sabr-o-sukun kahan hai tire intizar men
dil iḳhtiyar men na nazar iḳhtiyar men
furqat ki baat tak bhi gavara na thi jise
taare vo gin raha hai shab-e-intizar men
allah re ye bada-e-rangin ki shoḳhiyan
zahid ko piini paḌ ga.i ab ki bahar men
yad-e-jamal-e-dost ke qurban ja.iye
taskin pa raha huun dil-e-be-qarar men
jab tum ho mere paas ḳhizan bhi bahar hai
tum hi nahin to kaise lage dil bahar men
‘jauhar’ vo aaj aa.e hain thame hue jigar
kitna asar hai nala-e-be-iḳhtiyar men
Leave a Reply