main saari umr ahd-e-vafa men laga raha
anjam kah raha hai ḳhata men laga raha
saare purane zaḳhm na.e zaḳhm ne bhare
bekar itne din main dava men laga raha
aisa nahin ki chand na utra ho baam par
main hi tamam raat haya men laga raha
ai aql aur hoga koi us ki shakl ka
dil kaise maan le vo jafa men laga raha
ghar kar liya udaas fazaon ne dil men main
bahar ki ḳhush-gavar faza men laga raha
kya hai ye zindagi vo bata.ega kis tarah
jo shaḳhs saari umr qaza men laga raha
suraj to ja ke chain se bistar pe so gaya
shab bhar magar charagh hava men laga raha
mujh se namaz-e-ishq mukammal nahin hui
kis munh se main kahun ki ḳhuda men laga raha
bahra na mujh ko kar de ye ḳhamoshiyon ka shor
keval isi liye main sada men laga raha
kyuun mere haq men faisla utra nahin kabhi
main bhi to us ke saath dua men laga raha
vo chahta hai kya ye mujhe thi ḳhabar magar
men us ke saath saath dua men laga raha
Leave a Reply