Zaheer Kashmiri
andhiyan uTThin faza.en duur tak kajla ga.iin
ittifaqan do charaghon ki laven Takra ga.iin
aah ye mahki hui shamen ye logon ke hujum
dil ko kuchh biiti hui tanha.iyan yaad aa ga.iin
is faza men sarsarati hain hazaron bijliyan
is faza men kaisi kaisi suraten sanvla ga.iin
ai ḳhizan valo! ḳhizan valo! koi socho ilaaj
ye baharen paanv men zanjir si pahna ga.iin
phir kisi ne chheḌ di uzr-e-jahan ki dastan
dil pe jaise bhigi bhigi badliyan si chha ga.iin
Leave a Reply