safar men rasta jo pur-ḳhatar mila tha mujhe
bahut hi ḳhuub tha kyuun rahbar mila tha mujhe
jahan men jab koi jins-e-garan-shanas na tha
to itna besh-baha kyuun guhar mila tha mujhe
phir us ke ba.ad mira sar raha na shanon par
dayar-e-ishq men vo sang-e-dar mila tha mujhe
main ta-hayat farishton ke par kutar leta
jigar ka dard magar muḳhtasar mila tha mujhe
chaman men yar-e-sharar-bar ki ḳhuda.i men
shajar mila tha na koi samar mila tha mujhe
jo chahta use main bhi tabah kar deta
usi ke qurb men aisa hunar mila tha mujhe
suna tha sura-e-iḳhlas main ne aazar se
sanam-kade men ḳhuda ka hi ghar mila tha mujhe
hai mo.ajiza ki vo sidra maqam tak pahuncha
jo ek ta.ir-e-be-bal-o-par mila tha mujhe
ye meri abla-pa.i mujhe mubarak ho
vo din yahi tha ki izn-e-safar mila tha mujhe
kabhi ‘bashir’ ko main ne junun men dekha tha
ajiib sahab-e-fahm-o-nazar mila tha mujhe
Leave a Reply