Arsh Malsiyani
jo mera hosh ka aalam hai be-ḳhudi to nahin
main jis ko apna samajhta huun ajnabi to nahin
ḳhuda-gari ka ye mahir kuchh aur hi shai hai
tum aadmi jise kahte ho aadmi to nahin
ye aur baat hai mahrum-e-iltifat huun main
tire karam ke ḳhazane men kuchh kami to nahin
subut milta hai us se kisi ta.alluq ka
kamal-e-barhami-e-dost dushmani to nahin
nigah-o-dil men bhi lazim hai ik muravvat-o-kaif
numud-e-ariz-o-gesu hi dilbari to nahin
nuzul-e-barq hai shayad ye ashiyanon par
tu raushni jise samjha hai raushni to nahin
tumhare chehre pe asar hain ḳhushi ke magar
jo mere chehre se zahir hai vo ḳhushi to nahin
piye sharab ibadat-guzar hue ai shaiḳh
magar huzur ye shayan-e-bandagi to nahin
na jaane kyuun mire dil ko yaqin nahin aata
jo tu ne jalva dikhaya hai aarzi to nahin
suna hai tauba se hota hai taza-tar iman
hazar shukr ki ye ariza abhi to nahin
tabahiyon ke liye musta.id hain ahl-e-jahan
ye agahi kahin tauhin-e-agahi to nahin
bas ek marg-e-musalsal bas ek ranj-e-davam
kuchh aur shai hai ye ai ‘arsh’ zindagi to nahin
Leave a Reply