gulshan-ba-dosh nazreñ lab par hasīñ tarāna
har ik adā hai un kī ulfat kā ik fasāna
dīvāna-sāz gesū andāz-e-vālihāna
īmān lūTtā hai ye rang-e-kāfirāna
mahke hue laboñ par bahkā sā ye tabassum
phūloñ se Dhal rahā ho jaise sharāb-ḳhāna
ab tak nigāh meñ hai pahlī nigāh un kī
hañstī rahī mohabbat luTtā rahā zamāna
tāroñ kī bazm ho vo yā ho guloñ kī mahfil
har ek anjuman hai un kā hī jalva-ḳhana
un kī nazar panāheñ ḳhud dil meñ le rahī hai
bijlī ke saa.e meñ hai ab merā āshiyāna
kyā ho bayāñ kisī se tafsīr-e-husn-o-ulfat
sho.aloñ kī ik kahānī shabnam kā ik fasāna
duniyā-e-rang-o-bū meñ ye inqalāb-e-rangīñ
phūloñ kī haiñ jabīneñ kāñToñ kā āstāna
mujh ko ‘shifā’ miTānā āsāñ nahīñ hai koī
dekhūñ zarā muqābil aa.e mire zamāna