Laiq Aajiz
mujhe to jo bhi mila hai azaab ki surat
miri hayat hai ik tishna ḳhvab ki surat
havao dil ki taraf ehtiyat se jaana
vajud amn ka hai qaa.em hubab ki surat
malamaten gham-o-alam fikr mayusi
ye zindagi hai shikasta kitab ki surat
ḳhud apni kargasi fitrat se ho ga.e rusva
vagarna tum bhi uThe the uqaab ki surat
kabhi falak to samundar kabhi uTha laaya
pasand donon ko hai aftab ki surat
shaguftagi ki jagah jhurriyon ne le li hai
hamara chehra tha ‘ajiz’ gulab ki surat
Leave a Reply