Mujhe to Jo Bhi Mila Hai Azab Ki Surat

mujhe to jo bhī milā hai azaab kī sūrat

mirī hayāt hai ik tishna ḳhvāb kī sūrat

havāo dil kī taraf ehtiyāt se jaanā

vajūd amn kā hai qaa.em hubāb kī sūrat

malāmateñ ġham-o-ālām fikr māyūsī

ye zindagī hai shikasta kitāb kī sūrat

ḳhud apnī kargasī fitrat se ho ga.e rusvā

vagarna tum bhī uThe the uqaab kī sūrat

kabhī falak to samundar kabhī uThā laayā

pasand donoñ ko hai āftāb kī sūrat

shaguftagī kī jagah jhurriyoñ ne le lī hai

hamārā chehra thā ‘ājiz’ gulāb kī sūrat

Leave a Comment