Ahmad Ali Barqi Azmi
parvaz men jo saath na de asman par
behtar hai khaak daliye aisi udaan par
ab qurb-o-baad men na raha koi fasla
duniya simat ke aa gai mere makan par
mera harif darpai-e-azar hai mire
mujh ko hadaf banata hai vahm-o-guman par
shah-zor se kabhi nahin karta muqabla
chalta hai us ka zor faqat be-zaban par
mizan-e-adl ko nahin laata ba-ru-e-kar
karta hai inhisar vo farzi bayan par
ye khu-e-be-niyazi hai mujh ko bahut aziiz
aae kabhi na harf miri an-ban par
jis ki nahin hai aaj kahin koi yadgar
karta hai fakhr vo mire nam-o-nishan par
dehli men ek shaer-e-gumnam ka kalam
‘barqi’ hai ab muhit zaman-o-makan par
Leave a Reply