kaise kaise naam likhe the
vaqt ne mah-o-sal ke rukh par
tufanon ne paala maara
saare ho gae tittar-bittar
saiqal kar ke rakhna chaha
ham ne kuchh namon ko bacha kar
umr ki maujen baha le gaiin
saare laal aur saare javahir
tarz-e-khiram ke phuul khile the
aati jaati rahguzar par
aaj hai sirf ghubar ka parda
kaisi manzil kaisa manzar
dhajji dhajji bikhar rahi hai
tani hui ehsas ki chadar
kuchh harfon ki maddham si lau
kaanp rahi hai laraz laraz kar
khushbu apni kho baitha hai
sab sheron ka mushk aur ambar
surat apni badal chuke hain
ahd aqide masjid mimbar
kaise khali haath khade hain
shaah vazir amiir gadagar
ujdi khvab-o-khayal ki duniya
apne gharon men sab hain be-ghar
kyun-kar joden apne tukde
haar gae hain saare rafugar
khuni badal gahre gahre
chhate nahin hain baras baras kar
aur zaminen ankhen munde
mast hui hain lahu pi pi kar
ek tilismi khel racha hai
jaane kaun hai ye jadugar
Leave a Reply