Shab-E-Furqat Qaza Nahin Aati

shab-e-furqat qazā nahīñ aatī

laakh kahtā huuñ aa nahīñ aatī

chup haiñ vo sun ke shikva-e-aġhyār

baat bhī to banā nahīñ aatī

vo to va.ade pe aa chuke ai maut

tū bhī aatī hai yā nahīñ aatī

kis maraz kī davā haiñ aap agar

dard-e-dil kī davā nahīñ aatī

shīsha-e-dil hai kis qadar nāzuk

TūTne kī sadā nahīñ aatī

ham haiñ āzāda-rau jahāñ meñ ‘nasīm’

yaañ havas kī havā nahīñ aatī

Leave a Comment