Dushyant Kumar
pak ga.i hain adaten baton se sar hongi nahin
koi hangama karo aise guzar hogi nahin
in ThiThurti ungliyon ko is lapaT par senk lo
dhuup ab ghar ki kisi divar par hogi nahin
buund Tapki thi magar vo bundon barish aur hai
aisi barish ki kabhi un ko ḳhabar hogi nahin
aaj mera saath do vaise mujhe ma.alum hai
pattharon men chiḳh hargiz kargar hogi nahin
aap ke TukḌon ke TukḌe kar diye ja.enge par
aap ki tazim men koi kasar hogi nahin
sirf sha.ir dekhta hai qahqahon ki asliyat
har kisi ke paas to aisi nazar hogi nahin
Leave a Reply