chand ka raqs sitaron ka fusun mangti hai
zindagi phir koi andaz-e-junun mangti hai
muddaten guzrin ki yakh-basta hue qalb-o-jigar
ghairat-e-ishq magar soz-e-darun mangti hai
faiz-e-mausam tha parinde hue azad magar
khu-e-sayyad vahi said-e-zabun mangti hai
fasl-e-gul ke liye kya jaan pe khele koi
ab to har mauj-e-hava tohfa-e-khun mangti hai
kuchh to ai yurish-e-alam-o-havadis dam le
gardish-e-vaqt bhi thoda sa sakun mangti hai
khubi-e-fan nahin parvarda-e-avurd ‘sahar’
ruh-e-takhliq dam-e-kun-fa-yakun mangti hai
Leave a Reply