us ke aane ki ḳhabar chupke se laati hai hava
raat men sub.h ki manind jagati hai hava
naghmagi saaz men sanson ke utar jaati hai
dil ke sahraon men jab jhumti-gati hai hava
abr kuchh der baras ke jo chala jaata hai
der tak peḌ ki shaḳhon ko rulati hai hava
jab se ik phuul se chehre ne nazar pheri hai
aisa lagta hai ki is shahar se jaati hai hava
ret par yuun hain bagulon ki qataren ‘mina’
aaj bhi naqsh-e-qadam us ke miTati hai hava
Leave a Reply