baḌhti jaati hai ḳhayalon ki thakan aḳhir-e-shab
TuTne lagte hain yadon ke badan aḳhir-e-shab
saari duniya hai siyahi ke samundar ki tarah
chhin li vaqt ne ek ek kiran aḳhir-e-shab
raushni ban ke dabe paanv chala aata hai
un darichon se tira sanvala-pan aḳhir-e-shab
thak ke baiThi hai kahin duur musafir ki tarah
mere ḳhvabon se miri sub.h-e-chaman aḳhir-e-shab
har bun-e-mu se chhalakne lagi yadon ki sharab
aur gulnar hua tera badan aḳhir-e-shab
ek ik ḳhvab yahin dafn hua hai ‘saqib’
dekhna sog men hai arz-e-dakan aḳhir-e-shab
Leave a Reply