mata-e-ḳhun-e-jigar ashk ko pila baiThe
asasa haath men jitna tha sab uTha baiThe
kisi hasin se dil ko jo ham laga baiThe
to apni maut ko ḳhud aap hi bula baiThe
baḌa gunah kiya jo qubul ki davat
vo dil ko le uḌe aur duur ja baiThe
use bulane baiThane ka zikr hi kya hai
jo az-ḳhud aa.e nigahon men aur sama baiThe
hamare haal pe itna to vo karam kar de
ki dil na de na sahi kuchh qarib aa baiThe
nafa samajh ke base the tumhare kuche men
magar jo ganTh men tha vo bhi sab luTa baiThe
ham un buzurg ke pairav hain ek adna se
nazar ki raushni jo tuur par ganva baiThe
har ek bazm men charcha hai har zaban par zikr
ye kis se majra-e-ishq ham suna baiThe
vo dast-e-faiz to ‘rahbar’ nihal kar deta
umiid aap kisi aur se laga baiThe
Leave a Reply