tumhari yaad ki talḳhi abhi bachi hui hai
so ik sharab ki botal na.i rakhi hui hai
na astin men ḳhanjar na lab pe shirini
ye kaise aql ke dushman se dosti hui hai
vo phuul kis ke shabistan men khil raha hoga
jo mere kamre men ḳhushbu bhari bhari hui hai
abhi se falsafa-e-reg-zar ki baten
abhi to ishq ke maktab men haziri hui hai
vo ek shaḳhs jo dahliz tak nahin aata
usi ke naam ki shohrat gali gali hui hai
Leave a Reply