tumhārī yaad kī talḳhī abhī bachī huī hai
so ik sharāb kī botal na.ī rakhī huī hai
na āstīn meñ ḳhanjar na lab pe shīrīnī
ye kaise aql ke dushman se dostī huī hai
vo phuul kis ke shabistāñ meñ khil rahā hogā
jo mere kamre meñ ḳhushbū bharī bharī huī hai
abhī se falsafa-e-reg-zār kī bāteñ
abhī to ishq ke maktab meñ hāzirī huī hai
vo ek shaḳhs jo dahlīz tak nahīñ aatā
usī ke naam kī shohrat galī galī huī hai