Arsh Siddiqui
band ankhon se na husn-e-shab ka andaza laga
mahmil-e-dil se nikal sar ko hava taaza laga
dekh rah jaa.e na tu ḳhvahish ke gumbad men asiir
ghar banata hai to sab se pahle darvaza laga
haan samundar men utar lekin ubharne ki bhi soch
Dubne se pahle gahra.i ka andaza laga
har taraf se aa.ega teri sadaon ka javab
chup ke changul se nikal aur ek avaza laga
sar uTha kar chalne ki ab yaad bhi baaqi nahin
mere jhukne se meri zillat ka andaza laga
lafz ma.ani se gurezan hain to un men rang bhar
chehra hai be-nur to us par koi ghaza laga
aaj phir vo aate aate rah gaya aur aaj phir
sar-ba-sar bikhra hua hasti ka shiraza laga
rahm kha kar ‘arsh’ us ne is taraf dekha magar
ye bhi dil de baiThne ka mujh ko ḳhamyaza laga
Leave a Reply