gar kahin us ko jalva-gar dekha
na gaya ham se aankh bhar dekha
naala har chand ham ne gar dekha
aah ab tak na kuchh asar dekha
aaj kya ji men aa gaya tere
mutabassim ho jo idhar dekha
aine ko to munh dikhate ho
kya hua ham ne bhi agar dekha
dil-ruba aur bhi hain par zalim
koi tujh sa na muft par dekha
aur bhi sang-dil hua vo shokh
tera ai aah bas asar dekha
minnat o ajizi o zaari o aah
tere aage hazar kar dekha
to bhi tu ne na ai mah-e-be-mehr
nazar-e-rahm se idhar dekha
sach hai ‘bedar’ vo hai afat-e-jan
ham ne bhi qissa-mukhtasar dekha
Leave a Reply