Tumhein Khayal-E-Zat Hai Shuur-E-Zat Hi Nahin

tumhen khayal-e-zat hai shuur-e-zat hi nahin

khata muaaf ye tumhare bas ki baat hi nahin

ghazal faza bhi DhunDti hai apne khaas rang ki

hamara masala faqat qalam davat hi nahin

hamari saaton ke hissa-dar aur log hain

hamare samne faqat hamari zaat hi nahin

varaq varaq pe Diary men ansuon ka nam bhi hai

ye sirf barishon se bhige kaghzat hi nahin

kahaniyon ka ruup de ke ham jinhen suna saken

hamari zindagi men aise vaqiat hi nahin

kisi ka naam aa gaya tha yunhi darmiyan men

ab is ka zikr kya karen jab aisi baat hi nahin

Leave a Comment