Ek Aur Sal Girah

lo tisvan saal bhi biit gaya

lo baal rupahli hone lage

lo kasa-e-chashm hua khali

lo dil men nahin ab dard koi

ye tiis baras kaise kaate

ye tiis baras kaise guzre

asan saval hai kitna ye!

maalum hai mujh ko ye duniya

kis tarah vajud men aai hai

kis tarah fana hogi ik din

maalum hai mujh ko insan ne

kis tarah se ki takhliq-e-khuda

kis tarah buton ko paida kiya

maalum hai mujh ko main kya huun

kis vaste ab tak zinda huun

ik us ke javab ka ilm nahin

ye tiis baras kaise kaate

haan yaad hai itna men ik din

toffē ke liye roya tha bahut

amman ne mujhe piita tha bahut

haan yaad hai itna main ik din

titli ka taaqub karte hue

ik ped se ja takraya tha

haan itna yaad hai main ik din

nindon ke dayar men sapnon ki

pariyon se lipat kar soya tha

haan itna yaad hai main ik din

ghar valon se apne lad-bhid ke

tod aaya tha sab rishte-nate

haan itna yaad hai main ik din

jab bahut dukhi tha tanha tha

ik jism ki aag men pighla tha

haan ye bhi yaad hai main ik din

sach bol ke pachhtaya tha bahut

apne se bhi sharmaya tha bahut

haan ye bhi yaad hai mujh ko ki main

jab bahut hi be-kal hota tha

ashar bhi likkha karta tha

haan ye bhi yaad hai mujh ko ki main

roti rozi ki tamanna men

bada khvar hua is duniya men

haan aur bhi kuchh hai yaad mujhe

magar is ka javab kahan ye sab

ye tiis baras kaise guzre

ye tiis baras kaise kaate

ab is ke javab se kya hoga

chalo utho ki subh hui dekho

chalo utho ki apna kaam karen

chalo utho ki shahr-e-tamanna men

marham Dhunden un zakhmon ka

jo dil ne abhi tak khaae nahin

taabir karen un khvabon ki

jo ankhon ne dikhlae nahin

un lamhon ke hamraz banen

jo ziist men apni aae nahin

chalo tisvan saal bhi biit gaya

chalo mai chalkaen jashn karen

chalo sar ko jhukaen sajde men

is umr-e-faromaya ka safar

aadhe se ziyada khatm hua

Leave a Comment