daur-e-hazir ka ye kaisa gulsitan hai boliye
phuul to har samt hain ḳhushbu kahan hai boliye
aap bhi paḌhte to honge aj-kal aḳhbar men
jurm kis ka aur kis ki dastan hai boliye
raston se manzilon tak mere paanv ke siva
pattharon par kya koi taaza nishan hai boliye
salb ho kar rah ga.iin kyuun ehtajaji quvvaten
kaun ham logon men aḳhir be-zaban hai boliye
vo sitam-gar jis se duniya ko amaan milti nahin
kis liye vo aaj ham par mehrban hai boliye
jism miTTi ruuh mehman saans bhi us ki to phir
aap ko kis baat par itna guman hai boliye
kya kahen ‘tashna’ ki is tuk-bandiyon ke daur men
sha.iri ko ab koi sunta kahan hai boliye
Leave a Reply