Aa Tujhko KHayal Mein Basaun

aa tujh ko ḳhayāl meñ basā.ūñ

so.e hue dard ko jagā.ūñ

dil phaTne lagā hai yād-e-mahbūb

aa tujh ko hī ab gale lagā.ūñ

juz tere na sun sake koī bhī

is lai meñ tujhe maiñ gungunā.ūñ

ai naġhma-tarāz jism-e-mauzūñ

misre kī tarah tujhe uThā.ūñ

jo guzrā hai terī ḳhalvatoñ meñ

kaise vo zamāna bhuul jā.ūñ

ho bas meñ mire to sañg-dil ko

hālāt kā ā.īna dikhā.ūñ

Leave a Comment