Main Kai Barson Se Teri Justuju Karti Rahi

main kai barson se teri justuju karti rahi

is safar men arzuon ka lahu karti rahi

kya ḳhabar tujh ko guzari kaise main ne sham-e-gham

ansuon ka paani le kar main vuzu karti rahi

jab tiri yadon ne mujh ko niim pagal kar diya

main tiri tasvir se hi guftugu karti rahi

kis tarah apni tamannaon ka main karti shumar

bas tujhe paane ki har-dam aarzu karti rahi

dil ke darvaze pe jab bhi yaad ki dastak hui

main tasavvur men jigar apna rafu karti rahi

dil ki dhadkan kah rahi hai tu achanak aaega

ḳhud ko din-bhar aine ke ru-ba-ru karti rahi

sochna bhi mat kabhi tujh ko bhula degi ‘iram’

vasl ki ḳhvahish har ik lamha numu karti rahi

Leave a Comment