jism-o-jan kis gham ka gahvara bane
aag se nikle to angara bane
shaam ki bhigi hui palkon men phir
koi aansu aa.e aur taara bane
lauh-e-dil pe naqsh ab koi nahin
vaqt hai aa jaao shah-para bane
ab kisi lamhe ko manzil maan len
dar-ba-dar phirte hain banjara bane
kam ho gar jhuTe sitaron ki numud
ye zamin bhi anjuman-ara bane
jurm-e-na-karda-gunahi hai bahut
zindagi hi kyuun na kaffara bane
toḌ Dalen ham nizam-e-ḳhastagi
ye jahan kohna dobara bane
Leave a Reply