Guman paDta Yahi Hai Ki Rahbari Hui Hai

gumān paḌtā yahī hai ki rahbarī huī hai

ye apnī raah kisī raah se juḌī huī hai

hazār abr mohabbat yahāñ baras bhī chuke

bas ek shāḳh-e-tamannā nahīñ harī huī hai

guzishta shab se vo hai shahr meñ kahīñ maujūd

fazā meñ ḳhushbū-e-vābastagī rachī huī hai

milī thī ham ko ḳhudā se bahisht ke badle

magar ye zindagī me.aar se girī huī hai

ufuq pe phailā huā hai firāq-e-yār kā rañg

udaas shaam mirī god meñ paḌī huī hai

Leave a Comment