Mujhe Tum Shohraton Ke Darmiyan Gumnam Likh Dena

Zubair Rizvi

mujhe tum shohraton ke darmiyan gumnam likh dena

jahan dariya mile be-ab mera naam likh dena

ye saara hijr ka mausam ye saari ḳhana-virani

ise ai zindagi mere junun ke naam likh dena

tum apne chand taare kahkashan chahe jise dena

miri ankhon pe apni diid ki ik shaam likh dena

mire andar panahen DhunDti phirti hai ḳhamoshi

lab-e-goya mire andar bhi ik kohram likh dena

vo mausam ja chuka jis men parinde chahchahate the

ab in peḌon ki shaḳhon par sukut-e-sham likh dena

shabistanon men lau dete hue kundan se jismon par

hava ki ungliyon se vasl ka paigham likh dena