Shagufta Shafiq
ye tera iḳhtiyar kari dushmani pasand
mujh ko to mere yaar tiri dosti pasand
likhti huun main kahaniyan afsane tabsire
lekin hai mere dil ko bahut sha.iri pasand
gham ko to ishtihar banati nahin huun main
haan hansti-gati mujh ko to hai zindagi pasand
makr-o-fareb jhuuT se rahti main duur huun
us ko bhi mere dil ki yahi sadgi pasand
tere siva to koi bhi bhata nahin mujhe
par tujh ko har kisi se hi hai dil-lagi pasand
tera koi bhi dosh nahin janti huun main
teri talab hai ishq mujhe bandagi pasand
ḳhud ko kabhi ‘shagufta’ ji afzal na janiye
logon ke saath rab ko bhi hai ajizi pasand
Leave a Reply