obaidullah-aleem

Ajib Thi Wo Ajab Tarah Chahta Tha Main

ajiib thi vo ajab tarah chahta tha main

vo baat karti thi aur khvab dekhta tha main

visal ka ho ki us ke firaq ka mausam

vo lazzaten thiin ki andar se tutta tha main

chadha hua tha vo nashsha ki kam na hota tha

hazar baar ubharta tha Dubta tha main

badan ka khel thiin us ki mohabbaten lekin

jo bhed jism ke the jaan se kholta tha main

phir is tarah kabhi soya na is tarah jaaga

ki ruuh niind men thi aur jagta tha main

kahan shikast hui aur kahan sila paaya

kisi ka ishq kisi se nibahta tha main

main ahl-e-zar ke muqabil men tha faqat shaer

magar main jiit gaya lafz harta tha main

More Poems

Leave a Comment