abbas-tabish

Tere Liye Sab Chhod Ke Tera Na Raha Main

tere liye sab chhod ke tera na raha main

duniya bhi gai ishq men tujh se bhi gaya main

ik soch men gum huun tiri divar se lag kar

manzil pe pahunch kar bhi thikane na laga main

varna koi kab galiyan deta hai kisi ko

ye us ka karam hai ki tujhe yaad raha main

main tez hava men bhi bagule ki tarah tha

aaya tha mujhe taish magar jhuum utha main

is darja mujhe khokhla kar rakkha tha gham ne

lagta tha gaya ab ke gaya ab ke gaya main

ye dekh mira haath mire khuun se tar hai

khush ho ki tira madd-e-muqabil na raha main

ik dhoke men duniya ne miri raae talab ki

kahte the ki patthar huun magar bol pada main

ab taish men aate hi pakad leta huun paanv

is ishq se pahle kabhi aisa to na tha main

More Poems

Leave a Comment