jab jhuuT raviyon ke qalam bolne lage
har ḳhud-sari ko jah-o-hasham bolne lage
ik izn-e-lab-kusha.i ne bebak kar diya
dekho kis e’timad se ham bolne lage
koi kisi se puchh raha tha tira suragh
uTh uTh ke mere naqsh-e-qadam bolne lage
samjhe the astin chhupa legi sab gunah
lekin ghazab hua ki sanam bolne lage
haq-goi ke mahaz pe manzar badal gaya
ḳhamosh sab arab hain ajam bolne lage
tambih ki thi dil ki dahan bhi siye magar
main kya karun ki dida-e-nam bolne lage
mahaul bad-guman tha tang aa ke ‘taj’ bhi
ḳhamosh hone vaale the kam bolne lage
Leave a Reply