Aatish Indori
baat bachchon ki thi ladne ko siyane nikle
phir ajab kya hai ki bachche bhi ladake nikle
dhyan maan rakhti thi mera vo zamane nikle
hain yuun ab roz savere se kamane nikle
aam ke baagh se jab se hain parinde ghaeb
baad us ke kahan phir aam rasile nikle
potli jis ke liye ladti rahin auladen
maan ki us potli men sirf jharoke nikle
ye to kal-yug hai khara is men nahin hain koi
mujh ko shikva nahin sikke mire khote nikle
phir gharibon ki shikayat ka khuda hafiz hain
jab vaziron ke amiron hi se rishte nikle
gard jab saaf hui sab ne ye manzar dekha
jo nazar aate the unche vahi baune nikle
ibtida phir se hai ek aur safar ki ‘atish’
baad marne ke bhale pairon se juute nikle
Leave a Reply