Sahen Kab Tak Jafaen Bewafai Dekhne Wale

Muztar Khairabadi

sahen kab tak jafa.en bevafa.i dekhne vaale

kahan tak jaan par khelen juda.i dekhne vaale

tire bimar-e-gham ki ab to nabzen bhi nahin miltin

kaf-e-afsos malte hain kala.i dekhne vaale

ḳhuda se kyuun na mangen kyuun karen minnat amiron ki

ye kya denge kisi ko ana-pa.i dekhne vaale

buton ki chaah banti hai sabab ishq-e-ilahi ka

ḳhuda ko dekh lete hain ḳhuda.i dekhne vaale

mahinon bha.i-bandon ne mira matam kiya ‘muztar’

mahinon ro.e ḳhali charpa.i dekhne vaale