meer-mehdi-majrooh

Is Ke Jo Jo Ki Fawaed Hain Khud Dekhte Jao

is ke jo jo ki favaed hain khud dekhte jaao

sach kaha hai ye kisi ne ki piyo aur pilao

zabt sarkar men hone ke liye chhod na jaao

khuub hi khaao zar-o-mal ko aur khuub udaao

tum men aur ghair men jo shab ko hui hai sohbat

khud kahe deta hai vo aap ki ankhon ka jhukao

baithne ke nahin qabil ye sara-e-viran

yaan se toshe ke uthane ke evaz naav uthao

main huun makhmur mujhe taab kahan haan saaqi

saaf ho durd ho jaldi se jo mil jaae to laao

nahin bimar ko taklif zyada dete

apni ankhon ko mire samne itna na jhukao

dil men aa baithiye aur sair-e-do-alam kiije

hai bahut duur ka us manzil-e-viran se dikhao

munh se gar baat nikal jaae to aafat aa jaae

jo kahin chupke sune jaao zaban ko na hilao

main kahan aur kahan raat ka aana par haan

tere ghar se to bahut ghair ke ghar ka hai lagao

ukhde jaate hain qadam dekh vahan ki rangat

apna is dar pe hua hai na kabhi hoga jamav

dil ki abadi ki ab fikr hai bilkul nahaq

ab to yaan rose hi hota hai sipah-e-gham ka padav

baad ik umr ke gar arz-e-tamanna kiije

vo bigad kar yahi kahte hain ki baten na banao

garche ye jhuut fasana hai vale hai dilchasp

kahte hain apni kahani mujhe tum rose sunao

huun agar us ke evaz nim-nigah ka khvahan

hans ke kahte hain ki kuchh qimat-e-dil aur ghatao

avval-e-ishq hai dil kab hai samajhne vaala

abhi zoron pe hai is bahr par aafat ka chadhao

haal bhi kahte agar hosh thikane hote

yaan to hairat hai ki tum aur mujhe puchhne aao

dam nikalne ka alam kis se saha jaata hai

harf tum jaane ka ai jaan zaban hi pe na laao

un ko to pas-e-mohabbat nahin aslan lekin

nibh sake tum se agar hazrat-e-dil aur nibhao

zakhm-e-hijran ki nahin aur to duniya men dava

mundamil vasl ke marham se to hota hai ye ghaav

kab use dida-e-tar dava-e-ham-chashmi hai

aath aath aansu na tum abr-e-bahari ko rulao

un ke aane ke tasavvur men yahi kahta huun

ai shab-e-vaada na ho subh vo karte hain banav

vaan khapat hi nahin kya jins-e-vafa le jaaen

un ki sarkar men ik jaur-o-sitam ka hai banav

ab ho ‘majruh’ mohabbat se bahut ghabrate

ham to pahle hi ye kahte the ki dil ko na lagao

More Poems

Leave a Comment