ijazat kam thi jiine ki magar mohlat ziyada thi
hamare paas marne ke liye fursat ziyada thi
ta.ajjub men to paḌta hi raha hai aa.ina aksar
magar is baar us ki ankhon men hairat ziyada thi
bulandi ke liye bas apni hi nazron se girna tha
hamari kam-nasibi ham men kuchh ghairat ziyada thi
javan hone se pahle hi buḌhapa aa gaya ham par
hamari muflisi par umr ki ujlat ziyada thi
zamane se alag rah kar bhi main shamil raha is men
mire inkar men iqrar ki niyyat ziyada thi
mayassar muft men the asman ke chand taare tak
zamin ke har khilaune ki magar qimat ziyada thi
vo dil se kam zaban hi se ziyada baat karta tha
jabhi us ke yahan gahra.i kam vus.at ziyada thi
Leave a Reply