Sabir Abuhari
qalb-e-insan men jab raushni ho ga.i
duur duniya ki sab tirgi ho ga.i
ne.amat-e-gham har ik ka muqaddar nahin
ye jise bhi ata ho ga.i ho ga.i
manzilen rah ga.iin ban ke gard-e-safar
rahbar meri varaftagi ho ga.i
miT ga.i dil se har arzu-e-tarab
gham ki lazzat se jab agahi ho ga.i
jab bhulaya unhen zulmaten chha ga.iin
jab vo yaad aa ga.e raushni ho ga.i
un ke daman ki ḳhushbu se mahki faza
un ke ruḳh ki ziya chandni ho ga.i
dair-o-ka.aba se ham ko nahin kuchh gharaz
sar jahan jhuk gaya bandagi ho ga.i
raas aata hai ‘sabir’ tabassum kise
afat-e-jan gulon ki hansi ho ga.i
Leave a Reply