Zarra Insan Kabhi Dasht-Nagar Lagta Hai

Ram Riyaz

zarra insan kabhi dasht-nagar lagta hai

ba.az auqat hamen aisa bhi Dar lagta hai

ham-nashin teri bhi ankhon men jhalakta hai dhuan

tu bhi min-jumla-e-arbab-e-nazar lagta hai

koi leta hai tira naam to ruk jaata huun

ab tira zikr bhi sadiyon ka safar lagta hai

ham pe bedad-garo sang uThana hai fuzul

kahin uftada daraḳhton pe samar lagta hai

mere dil men baḌe a.ine hain tasviren hain

sach batana tumhen kaisa mira ghar lagta hai

shab ke mahbus hain sone ki ijazat hi nahin

aankh lagti hai to divar se sar lagta hai

‘ram’ is daur men qamat ki bulandi ke liye

sar pe insan ke surḳhab ka par lagta hai